El númberu de paraos continuó descendiendo en xunetu hasta llegar a los 78.717 desemplegaos

El descensu del paru n’Asturies continúa a bon ritmu al rexistrar en xunetu un 2,51 de desemplegaos menos que nel mes anterior. D’esta forma, el nuesu país tien agora 78.717 paraos, 9.335 menos qu’en febreru, cuando se batió’l récor históricu.
 
Si nos meses de mayu y xunu’l descensu foi del 2,9 por cientu, en xunetu ésti baxó hasta’l 2,5 por cientu. El númberu total de persones qu’abandonaron el paru, según les cifres asoleyaes pol Ministeriu de Trabayu y Inmigración, foi de 2.026 hasta sumar un total de 78.717 desemplegaos. Sicasí, si comparamos estes cifres coles rexistraes nel mesmu periodu del añu pasáu, obsérvase que’l númberu de paraos xubió en 7.042, un 9,82 por cientu más.
 
Del total de paraos asturianos, 37.410 son homes y 41.307, muyeres. El desemplegu ente los menores de 25 años contabiliza a 7.673 persones, de les que 4.212 son de xéneru masculín por 3.461 del femenín. Nel restu d'edaes, foi mayor el paru ente muyeres (37.846) qu’ente homes (33.198). El paru baxó de manera especial nel sector de los servicios –dalgo habitual nestes feches–, onde se rexistraron 1.685 desemplegaos menos, siguíu de la Industria (267), la Construcción (170) y l'Agricultura (20). Per otra parte, el paru medró nel sector ensin empléu anterior en 116 persones.
 
A nivel estatal, el paru quedó al acabar xunetu en 4.079.742 millones de persones, en baxando en 42.059 paraos, con un descensu porcentual del 1,02 por cientu sobre'l mes de xunu. La cayida del paru nel mes de xunetu, beneficiáu pola temporada turística, ye menos pronunciada que la rexistrada hai un añu, cuando'l paru baxó esi mesmu mes en 73.790 persones. El territoriu onde hubo un mayor descensu del desemplegu foi en Ceuta, con una cayida del 5,36 por cientu, seguíu de Galicia (4,52) y Cantabria (4,25 por cientu). Nel lláu contrariu tán Canarias y Aragón, onde medró un 0,66 por cientu, y Melilla (0,33).
 
En términos añales, el desemplegu creció nel Estáu un 4,38 por cientu pa sumar 171.164 paraos más. Onde más se notó la medra nesti añu últimu foi n’Euskadi, onde algamó un 11,34 por cientu al sumar 14.265 desemplegaos más, a la que-yos sigue Melilla (10,63 por cientu) y Asturies col citáu 9,82 por cientu. Les meyores cifres al respeutu rexístrales Canarias y Illes Balears, con un descensu del 3,44 y 1,57, de manera respeutiva.