El Muséu del Pueblu d'Asturies recibe la donación de dellos documentos de los sieglos XVIII y XIX

Hasta'l 2 d'ochobre van permanecer espuestos na recepción del Muséu del Pueblu d'Asturies dellos documentos pertenecientes a la Congregación de Nuestra Señora de Covadonga de Naturales del Principado de Asturias en Madrid. Son toos del sieglu XVIII, a esceición d'una carta fechada nel 1814.

La documentación procede de la coleición que reunió Manuel Gurdiel (Cangas del Narcea, 1941-Madrid, 2014), profesor titular de Derechu Penal de la Universidad Complutense de Madrid y un apasionáu bibliófilu por mor d'una donación fecha poles sos fíes Benigna Kopp-Gurdiel y Elisa Gurdiel Wedel. Del paquete entregáu destaca sobre manera una serie de cinco 'Inventarios generales de las alhajas de la Real Congregación' correspondientes a los años 1749, 1762, 1768, 1779 y 1784, y un pliegu cola tasación de las alhaxes de plata (cruces, corones, medayes, bandexes, llámpares, arañes, etc.), qu'ufren una información valiosa sobre'l patrimoniu de la congregación, los nomes de los donantes y la impresión de grabaos cola imaxe de la Santina y el santuariu, que foron los primeros d'esta clase que se fixeron sobre Cuadonga.

La Congregación de Nuestra Señora de Covadonga de Naturales del Principado de Asturias fundóse en Madrid nel 1743 con fines relixosos y asistenciales, y ye la primer asociación creada por asturianos fuera de la so tierra, polo que se considera un antecedente de los futuros centros asturianos que se crearon a partir de finales del sieglu XIX. A ella pertenecieron el conde de Campumanes, Xovellanos, Cean Bermúdez, Carlos González Posada, Francisco Martínez Marina o José Francisco Uría.

Información que se daba por perdida

El Muséu del Pueblu d'Asturies tien un enfotu especial pola documentación perteneciente a esta congregación, que se daba por perdida dende la Guerra Civil. El conxuntu de documentos más importante ingresó na instalación nel 2014 por una donación de Fernanda Suárez Gutiérrez.