El Muséu del Pueblu d’Asturies presenta “Trés estudios antropolóxicos sobre l’occidente d’Asturies"

Los investigadores Matilde Córdoba Azcárate, Cristián Rozas Vidal y Consuelo Hernández Valenzuela son los autores de "Trés estudios antropolóxicos sobre l'occidente d'Asturies" obra que fai'l númberu 13 de la colección "Fontes pal estudiu de l'Antropoloxía Asturiana" qu'edita'l Muséu del Pueblu d'Asturies.

Esti llibru, resultáu d'un conveniu ente'l El Muséu del Pueblu d'Asturies y el departamentu d'Antropoloxía Social de la Universidá Complutense de Madrid, recueye trés estudios qu'analicen otraos tantos temes distintos de la realidá social y antropolóxica del occidente astur.

Asina l'antropóloga Matilde Córdoba Azcárate analiza'l turismu rural y la so rellación col desarrollu local nel conceyu de Taramundi. Nel so estudiu, l'autora llega a la conclusión de qu'existe "más d'un Taramundii" sorrayando como, mientres nos cartafueyos turísticos se destaca l'arquitectura, el paisaxe y l'artesanía, tapécense realidaes como l'avieyamientu de la población, la estacionalidá del turismu y l'impactu de la industria maderera xunto col desequilibriu económicu del conceyu.

Pela so parte, Cristián Rozas Vidal atiende pal procesu de reconversión productiva nun pueblu ganaderu del conceyu de Tinéu y la reestructuración de les rellaciones sociales qu'ello leva arreyao, estudiando l'impactu de la entrada en mercaos nacionales y internacionales o la profesionalización del campu.

P'acabar el llibru, Consuelo Hernández Valenzuela analiza la enseñanza de la llingua y cultura asturianes nel sistema educativu, analizando les ideees que tienen sobre estos conceptos los enseñantes y los habitantes d'un ueblu de Cangas del Narcea de distintes xeneraciones.

El llibru tien una presentación de la profesora María Cátedra, caderalga y xefa del Departamentu d'Antropoloxía Social de la Universidá Complutense de Madrid y estudiosa de los vaqueiros d'alzada.