El Muséu del Pueblu d’Asturies faise n’Iruña con una lata de chicolates de La Gijonesa del sieglu XIX

Ente’l 1860 y el 1960 esistieron en Xixón 57 fábriques de chicolate. Una d’elles yera La Gijonesa, de la que’l Muséu del Pueblu d’Asturies adquirió n’Iruña una lata metalgrafiada d’hacia’l 1893 en bon estáu de conservación que s’incorpora a la esposición permamente del recintu ‘Los asturianos na cocina. La vida doméstica d’Asturies, 1800-1965’.

“Ún de los significaos de la pallabra ‘monumentu’ ye’l de ‘un oxetu de gran valor pa la historia o pa l’averiguación de cualesquier fechu” espresen dende’l Muséu del Pueblu d’Asturies, pa depués esplicar qu’esta lata de La Gijonesa “hai que la considerar un monumentu de la industria decimonónica xixonesa pol so tamañu (altor: 17 cm; llargor: 28 cm; anchor: 10,5 cm), la so calidá, los diseños que la decoren, la so rareza y el so bon estáu de conservación”. Nun se conoz la firma que la fabricó, “pero ye mui probable que se fixera na Litografía Artística Moré fundada en Xixón nos años ochenta del sieglu XIX”.

La fábrica de chicolates La Gijonesa entamó a funcionar nel 1888, con sede na cai Llibertá númberu 34, y yera propiedá de Pírez y Alonso. Facía’l so productu mecánicamente con enerxía producida por una máquina de vapor y nel 1897 treslladóse a la cai Cabrales.

La decoración d’esta lata de la firma conviértela nun modelu d’envase comercial del terciu últimu del sieglu XIX, con detalles nes cuatro cares y la tapa. “Rescamplen los dos llaos llargos. Nún apaez la fachada de la fábrica La Gijonesa, que ye un gran edificiu de planta baxa y dos torres llaterales onde taríen les oficines y la vivienda de dalgún encargáu o vixilante, cola chimenea echando’l fumu de la caldera de la máquina de vapor, iconu del progresu de la época. Nel otru llau hai una escena onde una criada vestida d’asturiana sirve chicolate a una muyer y un neñu sentaos alredor d’una mesina y vistíos con indumentaria burguesa de moda naquel tiempu”, apunten dende’l muséu.

Según espliquen, “el vistíu de la criada ye una clara referencia al so orixen llabrador, como asina yera na vida real, onde la mayor parte de les sirvientes urbanes procedíen del entornu rural inmediatu. La escena tamién muestra que’l chicolate tovía yera un artículu reserváu a les clases sociales riques, a les que va dirixida esta escena publicitaria, y el so consumu nun se popularizara, anque en pocu tiempu diba ser un productu al algame de toles clases sociales”.

Los llunes, pesllao

La lata de La Gijonesa yá se pue visitar nel Muséu del Pueblu d’Asturies na vitrina dedicada al chicolate en la época del 1880 al 1936 de la esposición ‘Los asturianos na cocina. La vida doméstica d’Asturies, 1800-1965’. L’accesu al recintu ye de baldre y esti mes abre de martes a vienres n’horariu de 10 a 19, y de 10.30 a 19 los sábados y domingos, mentes que los llunes pieslla.

Semeya del Muséu del Pueblu d'Asturies.