El Muséu del Pueblu d’Asturies faise colos fondos de Sánchez-Andrade

El musicólogu Julio Sánchez Andrade fai entrega esta mañana al Muséu del Pueblu d'Asturies de los fondos documentales del llabor de campu pa la so tésis doctoral sobre la percusión tradicional na música asturiana, que-y valió un premiu nacional

Sánchez-Andrade ye profesor titular de percusión del Conservatoriu de Xixón y músicu en delles formaciones, ente elles Nuberu. Los materiales que yá tan en fondu del Muséu del Pueblu d'Asturies incluyen grabaciones de campu n'audiu y vídeu y les entrevistas que se-yos ficieron a más de 80 informantes un estoyu que fai más de 16 horas de grabación. Sánchez-Andrade defende na so tesis doctoral la riqueza del patrimoniu acústicu de la música asturiana y la so vixencia actual y proyección hacia'l futuru, argumentando que la llinia de tresmisión oral ente xeneraciones d'esta música nun ta rota. La tesis presenta la tradición de la percusión asturiana analizando tanto los instrumentos como les maneres de tocalos, una cuestión na que Sánchez Andrade, percusionista y batería especialista en bien d'estilos ye toa una autoridá, y los contestos en que s'emplega cada música.

D'otra manera, la entrega de los materiales va seguise l'añu qu'entra de la edición de la tésis doctoral de Sánchez - Andrade por parte del Muséu del Pueblu d'Asturies. Esti trabayu doctoral consiguió'l premiu nacional d'investigación "Marqués de Lozoya" y mereció la calificación de sobresaliente cum laude por parte del tribunal de la Universidá d'Uviéu.