El Muséu de Belles Artes busca dar visibilidá a la Lliteratura dende l'Arte

Entama actividaes con motivu del Día Mundial del Llibru y del Derechu d'Autor (23 d'abril).

La primera d'elles va celebrase esta tarde, dende les 17 hores, y va consistir nuna visita audioescrita pa persones con discapacidá visual entitulada 'Arte y literatura'. Los asistentes van disfrutar d'un percorríu descriptivu per delles obres del Muséu de Belles Artes d'Asturies inspiraes en dalgunos de los llibros más difundíos de la historia, como la Biblia, el Quixote de Miguel de Cervantes o 'La Regenta' de Leopoldo Alas 'Clarín', nel que los asistentes van tar acompañaos polos acordes d'un violín que va interpretar distintos cachos de pieces musicales afines a la temática y époques que van trabayase mientres la ruta.

El vienres ta prevista la segunda actividá, que va consistir nuna lliberación de llibros de biblioteques de museos. "L'oxetivu d'esta iniciativa ye recordar l'importante papel que les biblioteques de museos desendolquen na documentación, investigación y difusión de les coleiciones, al empar que se fomenta la llectura", espliquen dende'l Belles Artes, que participa per quintu añu nesta iniciativa creada nel 2007 pola institución vasca ARTIUM.

El Fontán, el Campu San Francisco o'l tresporte público d'Uviéu son dalgunos de los puntos onde van dexase, a partir de les 10 hores, exemplares sobre les diferentes coleiciones y esposiciones del muséu. Cualquier persona pue participar nesta esperiencia, non sólo recoyendo llibros, sinón tamién poniendo en circulación otros de la so propiedá, rexistrándolos previamente na páxina web de Bookcrossing.