El Muséu de Belles Artes abre al públicu los trés edificios tres finar la so reforma

El complexu recupera'l Palaciu de Velarde y la Casa d'Oviedo-Portal, que permanecíen parcial y temporalmente zarraos poles obres de reforma, y incorpóralos al edificiu d'Ampliación, inauguráu va agora un añu. La pinacoteca muestra 782 obres d'arte distribuyíes en 4.500 metros cuadraos d'esposición.

Tres esta reinauguración el visitante va poder realizar el percorríu completu al Muséu de Belles Artes d'Asturies accediendo por cualesquier de los dos entraes gracies a la conexón ente los distintos espacios, tanto si s'aporta a la instalación dende la cai Santa Ana al Palaciu de Velarde, como si se fai dende la plaza d'Alfonso II al edificiu d'ampliación. Amás, la esposición aumenta de  los 450 obres que tenía enantes de los trabayos a les 782 actuales.

El Muséu de Belles Artes d'Asturies presenta tamién con esta apertura al públicu la puesta a puntu de les sos instalaciones –pintura, iluminación y meyora d'elementos muebles– y la revisión de toes y caúna de les obres espuestes, depués de contrastar y actualizar les sos dataciones y atribuciones, y comprobar el so caltenimientu correctu. Estos trabayos realizáronse en paralelu a la definición del diseñu y el desenvolvimientu d'una ambiciosa concepción del montaxe, asina como a la incorporación d'una señalética singular, que facilita la visita, y la implementación de materiales nuevos de divulgación.