El Musel garró fuelgu en setiembre

El puertu de Xixón - El Musel
presentó nel mes de setiembre unos volúmenes de tráficu
qu'espoxigaron un 2,76% respective a setiembre de 2002. Sicasí, el
repunte en movimientu de mercancies nun ye a iguar el camín d'un
añu probetayu nel mayor puertu d'Asturies, y asina no que se lleva
d'añu'l movimientu de mercancíes ta un 14,38% perbaxo del
que se rexistró ente xineru y setiembre del 2.002.



El movimientu de setiembre foi de 1.673.115 tonelaes, contra les 1.628.246 de
setiembre del 2.002, y el total del añu ye de las 13.390.743 tonelaes
nel 2.003 contra les 15.640.188 del 2.002. Les entraes de carbón, productos petrolíferos y esfaltu foron les qu'emburriaron la xuba de tráficos nel puertu, pero, l'auténtica locomotora del Musel, la terminal de graneles d'EBHISA, volvió a rexistrar baxa de tráficos, perdiendo'l 1,96% respective a setiembre de 2.002 y el 17,05% nel acumuláu del añu. EBHISA movió
en septiembre 1,315 millones de tonelaes, menos que en setiembre del 2.002 y lleva nel total del añu un desfase de 2,1 millones de tonelaes en comparanza col añu pasáu.

De los cerca de 18 millones de tonelaes que pue mover El Musel nun añu, el 75% pasen peles grues de la terminal d'EBHISA, que ye la que furne de carbón a Aboño y de fierro y carbón siderúrxico a Arcelor. Los tres tráficos lleven tol añu perbaxo de los índices del añu pasáu, rescamplando la baxada del mineral de fierro, que ya ye del -23,89% respective a xineru-setiembre del 2.002, periodu en que'l puertu llevaba descargaes cerca de 1.200.000 tonelaes más qu'agora. El carbón térmicu tamién baxó enforma, y presenta unos númberos nestos primeros 9 meses del añu del -18,73%. El total de barcos que lleven entrao a puertu tamién ye significativu, pasando de los 810 barcos del 2.002 a los 723 del 2.003.