El Muséu Etnográficu del Oriente d’Asturies remató l’añu 2005 con récord de visites

El Muséu Etnográficu del Oriente d'Asturies, en Porrúa, conceyu Llanes, fizo a lo llargo del añu 2005 un total de 21.022 visites, una cifra que supón una xuba de visitantes de cerca del 43% respective al 2004 y que ye un récord dafechu pa la institución qu'empobina l'Asociación Cultural "Llacín" de Porrúa y que xestiona una fundación independiente.

Xunetu y agostu, en que'l muséu tuvo 4.312 y 5.660 visitantes foron los meyores meses del añu en númberu de visitantes, pero cuando se dio l'auténticu reblagu de visites foi al rau de que se-y concediere a Porrúa'l Premiu Príncipe d'Asturies al Pueblu Exemplar d'Asturies, un reconocimientu que-y dio sonadía a esti pueblu llaniscu y que llevó a munchos visitantes al so muséu etnográficu en meses de fuera de temporada como son davezu los meses d'ochobre y payares. Nel primeru , que foi cuando se fexo la entrega del Premiu, hebo 1.339 visites contra les 870 del 2004, mientres qu'en payares pasaron pela puerta del muséu 1.232 visitantes polos 310 del 2004.

Inauguráu en xunetu del 2000, l'Etnográficu de Porrúa organiza bien d'actividaes a lo llargo del añu como los tradicionales cursos sobre ellaboración de sidra, y participa tamién na Rede de Pueblos Culturales d'Europa.