El Muséu Etnográficu del Oriente acueye esti xueves la presentación del quintu volume del Atles Sonoru

El quintu volume del Atles Sonoru de la Llingua Asturiana va ser presentáu esti xueves a les 12 hores nel Muséu Etnográficu del Oriente, en Porrúa. Ésti ta editáu pola Rede de Museos Etnográficos d'Asturies y el Muséu del Pueblu d'Asturies.
 
La fala del oriente d'Asturies, en concreto de los conceyos de Ponga, Amieva, Cangues d'Onís, Onís y Cabrales, protagoniza esti volumen del Atles, qu’ufierta una serie de grabaciones de campu que muestren la fala viva de la zona al traviés de lleendes y cuentos, relatos etnográficos y históricos tresmitíos oralmente. Agora, gracies a esti trabayu, pasen a ser una manifestación tanxible del patrimoniu inmaterial d'Asturies. El CD, amás, vien acompañáu por un llibretu cola descripción de los fenómenos llingüísticos más relevantes del oriente d'Asturies y la trescripción de toles grabaciones sonores, según mapes de llocalización y fotografíes de los informantes.
 
Al actu de presentación d’esta xoya cola que se termina d’abarcar tola xeografía asturiana, van tar presentes Juaco López Álvarez, direutor del Muséu del Pueblu d'Asturies; Jesús Suárez López, responsable del Archivu de la Tradición Oral d'esti muséu y de la edición del Atles Sonoru de la Llingua Asturiana; Pilar González Lafita, direutora de la Fundación Municipal de Cultura, Educación y Universidá Popular de Xixón; y Consuelo Vega, direutora xeneral de Política Llingüística de la Conseyería de Cultura y Turismu.