El Presidente del Gobiernu asturianu Vicente Álvarez Areces, la Conseyera de Cultura Ana Rosa Migoya y el Director Xeneral de Promoción Cultural y Política Llingüística Carlos Madera asistieron ayeri a la presentación en Muséu del Pueblu d'Asturies del Conceyu de Xixón a la presentación del proyectu que, al traviés del Muséu del Pueblu d'Asturies y cola ayuda del Gobiernu asturianu y del mesmu Conceyu de Xixón, va echar a andar dende l'añu baxo'l nome "Documentación, custodia y espardimientu del patrimoniu oral d'Asturies". Con una financiación de 64.000 euros, esti proyectu quier llevar alantre un trabayu sobre toa Asturies de recoyida de documentación al traviés d'encuestes, catalogación y dixitalización de documentos rellacionaos cola tradición oral y vezos asturianos.
El Gobiernu asturianu al traviés de la Conseyería de Cultura y el Conceyu de Xixón cuerren a medies col coste d'esti proyectu, que coincide cola creación de la Rede de Museos Etnográficos d'Asturies, que va coordinar d'agora en p'alantre les actividaes de los museos etnográficos de Santalla d'Ozcos, Grandas de Salime, Navia, Tinéu, Somiedu, Grau, Quirós, Morcín, Gozón, Nava, Casu y Llanes baxo la dirección del Muséu del Pueblu d'Asturies de Xixón. L'alcuerdo prevé, ente otros puntos, el desarrollu d'un programa d'espardimientu cola creación de circuitos que permitan potenciar estos museos y la xeneración d'una llinia editorial común a toos ellos que valga pa esparder los resultaos de les investigaciones de tolos museos de la rede.
Al actu de presentación de los convenios acudió'l Presidente Asturianu Vicente Álvarez Areces, que dio un discursu nel qu'emponderó la importancia pa la investigación y el mundu de la ciencia etnográfica de los proyectos que se presentaben al empar que dio anuncia del estáu en que s'alcuentren dellos de los proyectos d'inversión del Gobiernu asturianu en materia museística. Areces adelantó que ta encargáu'l Plan Director pal desarrollu del Centru Integral pa la Cultura y el Ociu del Muséu de la Industria n'Avilés y que se ta a la espera del estudiu definitivu sobre'l mesmu. L'apertura del Muséu del Oru d'Asturies, en Navelgas (Tinéu), con una inversión de cerca de 725.000 euros tamién va producise d'equí a la vuelta de poco, según Areces, que tamién adelantó que'l muséu de la siderurxa de Llangréu va entamar a ser d'equí a poco "una realidá".