El Muséu Arqueolóxicu d’Asturies reabre le sos puertes

Tres 12 años de trabayos d’ampliación y rehabilitación, el Muséu Arqueolóxicu d’Asturies reabrió esti llunes les sos puertes. Al actu inaugural nun acudió nengún representante del equipu de gobiernu del Conceyu d’Uviéu.
 
Los trabayos, que tuvieron una inversión de 15,5 millones por parte del Ministeriu de Cultura, nel marcu del Plan de Modernización de los Museos Estatales, y una dotación de más de 930.000 euros de la Conseyería de Cultura y Turismu, convierten a esti muséu nun de los principales de la rede museística asturiana. La nueva instalación ta dividida en cinco árees permanentes –prehistoria, neolíticos, los castros, Roma y Asturies medieval– y muestra una coleición estraordinaria de 2.053 pieces. Munches d’elles nunca tuvieron espuestes nel muséu.
 
A la inauguración del Muséu Arqueolóxicu d’Asturies acudieron Vicente Álvarez Areces, presidente del Gobiernu d’Asturies, y Ángeles González-Sinde, ministra de Cultura, ente otres autoridaes. González-Sinde calificó la coleición del muséu de “sobresaliente” y destacó que nesta etapa nueva l’Arqueolóxicu va tar a l’altor de les instituciones más emblemátiques y representatives de l’arqueoloxía y el patrimoniu del Estáu. Mentes, Areces mostróse satisfechu d’inaugurar tres años d’un “esfuerzu enorme presupuestariu, políticu y téunicu” una “xoya espectacular” que recueye un “pasáu milenariu”. Hai que destacar l’ ausencia de representación del equipu de gobiernu municipal d’Uviéu nel actu inaugural.
 
Nos seis meses próximos la entrada a esti muséu, asitiáu nel monasteriu uviedín de San Vicente, va ser de baldre de miércoles a sábadu, n’horariu de 09.30 a 19.30 hores; y los domingos, de 09.30 a 15.30 hores.