El Muséu Arqueolóxicu d’Asturies escaez l’usu del asturianu

La Xunta pola Defensa de la Llingua Asturiana denuncia l’ausencia del asturianu y de la toponimia tradicional nel Muséu Arqueolóxicu d’Asturies. La instalación reabrióse’l llunes tres doce años de trabayos d'ampliación y rehabilitación.
 
“La Conseyería de Cultura vuelve a riise de la llegalidá y del patrimoniu que tien el mandáu de protexer. Depués de 12 años de retrasos y polémiques, y 20 millones d’euros gastaos, nin siquiera ye quien a cumplir unos mínimos razonables nel respetu a la ciudadanía”, señalen dende la Xunta, que denuncia “el silenciu cómpliz” de la Direición Xeneral de Política Llingüística, dependiente d’esa conseyería. “Al otru día d'inaugurase un muséu onde nun se respeta la toponimia oficial, la Dirección Xeneral de Política Llingüística fai una rueda de prensa pa esplicar cómo promocionen la toponimia oficial. Nun pueden reclamar credibilidá cuando la humillación nel departamentu propiu ye la norma que marca la so inoperancia. ¿Cómo pue un departamentu l'Alministración, la mesma qu'aprueba nel BOPA la toponimia oficial, incumplir sistemáticamente la llegalidá toponímica? Nun hai más que ver los paneles: ‘Morillón’, pol oficial Moriyón, ‘Gamonedo’, pol oficial Gamonéu; ‘Cabañaquinta’, pol oficial Cabanaquinta; etc.”, añaden.
 
Esta situación lleva a la Xunta a reclamar “la rectificación inmediata de tolos elementos d’información, señalización y descripción del Muséu Arqueolóxicu d’Asturies p'adaptalos a la llegalidá vixente en materia de toponimia”. D’igual forma, esixe la presencia de l’asturianu n’igualdá de condiciones coles demás llingües presentes nel Muséu, “porque l'unicu billingüismu qu'entienden los responsables de Cultura paez ser col inglés”.