El mundu decide en Moscú sobre l'efectu invernaderu

Del 29 de setiembre al 3 d'ochobre celébrase en Moscú la Conferencia Mundial sobre Cambéu Climáticu. los puntos más importantes de l'axenda nesti cume internacional van ser la evaluación del Protocolu de Kioto y la creación del mercáu internacional de derechos d'emisión de CO2, pol que los países menos contaminantes van poder vendé-yos cuota de contaminación a otros que por razones estructurales del so mercáu enerxéticu y industrial precisen de más cuota de la que-yos dea l'organismu internacional.

España llega a Moscú 2003 siendo, xunta Irlanda y Portugal, ún de los países que más lloñe ta de cumplir coles emisiones de gases d'efectu invernaderu que s'apautaren dientro del oxetivu global de la UE.

Énte esta situación, calcúlase que les empreses españoles (les más d'elles les del sector elléctricu) tendríen d'invertir sobre 6000 millones d'euros p'adaptase a la normativa sobre contaminación, pero l'adptación a los criterios va depender del preciu que tenga la tonelada de CO2 nel futuru mercáu de derechos d'emisiones, que la UE quier que funcione yá pal añu 2005. Si la tonelada de CO2 se tasa a un preciu altu, les empreses tendrán de pasar pel aru y baxar la contaminación, pero en casu de que se tase barata, a les eléctriques saldrá-yos más barato mercar derechos en terceros países.