El movimientu 15-M entra na sede vieya de la Conseyería de Salú pa recuperala pa la ciudadanía

Na nueche del martes, coincidiendo cola celebración de los seis meses de vida del movimientu 15-M, mediu centenar d’indignaos tomaron la sede vieya de Salú. Quieren recuperar esti edificiu abandonáu pa da-y un usu cultural y asociativu.
 
De momento, la Policía nun actuó pa desallugar a los indignaos, que denuncian la situación del edificiu asitiáu en Xeneral Elorza y el d’enfrente, qu’acoyó la Conseyería de Bienestar Social, dambos propiedá de Sedes tres una permuta polémica nel 2005 con unos terrenos a les ales del Calatrava. Los vecinos demandaben que los dos inmuebles se destinaran a usos culturales y asociativos, pero les previsiones de la empresa de participación pública son les de tiralos pa llevantar nel solar 77 pisos con un preciu d’alredor de 3.500 euros el metru cuadráu. Una maniobra d’especulación urbanística que tien el refugu de vecinos y indignaos.
 
El movimientu 15-M, tres entrar nel edificio, principió l’acondicionamientu del mesmu pa entamar nél un centru social, anque dalgunes persones yá llevaben siete díes trabayando nello cola previsión de la ocupación d’ayeri. La intención de los indignaos ye permanecer nel inmueble antiguu de la Conseyería de Salú’l tiempu máximu posible. Mañana tienen previsto dar una rueda de prensa pa esplicar les sos reivindicaciones.