El movimientu 15-M celebra con una manifestación n'Uviéu l’aniversariu de la toma de les places

Baxo’l lema ‘Esto nun ye una crisis, ye'l capitalismu’, el movimientu 15-M torna a salir a la cai esti sábadu. Una gran manifestación ta convocada n’Uviéu pa celebrar l’aniversariu de la toma de les places mayores del país.
 
Les asamblees del 15-M Asturies llamen a la ciudadanía a partcipar nes xornaes de movilizaciones que se convoquen a nivel mundial. La manifestación asturiana va partir a les 18 hores de la Estación del Norte y va terminar na Escandalera, onde ta previsto la celebración d’un conceyu ente tolos presentes. La organización considera fundamental "que la xente participe y s’esprese, frayando l'aislamientu y l'individualismu que'l sistema fomenta", y caltién que “quedar en casa, nel contestu actual, significa dar vía llibre a munchos más recortes y agresiones por parte de los beneficiaos de la situación: la banca y les grandes empreses".
 
Hai un añu por estes feches, indignaos d’Asturies y de tol Estáu salieron a la cai movíos pol espíritu que naciera en marzu del 2011 gracies al espíritu reivindicativu d’un grupu de ciudadanos qu’utilizaron Internet pa entamar convocatories de protesta contra la banca y el sistema baxo’l lema ‘Democracia real yá’. El movimientu 15-M ocupó per delles selmanes places de ciudaes y pueblos y convocó manifestaciones nes que participaron miles de persones.