El movimientu 15-M Asturies llama a arrodiar la Xunta Xeneral

Esti martes tán convocaes delles manifestaciones en Madrid que llamen a arrodiar el Congresu de los Diputaos p’amosar la so disconformidá colos políticos y la situación actual. El movimientu 15-M convida a facer lo propio n’Asturies.

“Ye tiempu de lluchar por un modelu políticu, económicu y social nuevu, y aparar l’agresión contra los derechos sociales, llaborales y de les muyeres, el mediu ambiente y los servicios públicos", argumentó’l 15-M asturianu p’animar a la ciudadanía a asistir a esta convocatoria prevista pa les 19.30 hores frente a la Xunta Xeneral. Los indignaos asturianos creen que "sobren los motivos pa que la ciudadanía se manifieste y recuerde que la soberanía reside nel pueblu y non nos mercaos, nin n’instituciones financieres opaques al marxe de cualquier control democráticu".

Esta convocatoria coincide coles marches previstes esta tarde en Madrid p’arrodiar el Congresu de los Diputaos. Na capital castellana tán desplegaos dende ayeri pela nueche más de 1.300 antidisturbios pa evitar que los manifestantes traten d’entrar na cámara baxa.