El Monte Deva celebra una xornada sobre les ‘llárimes de San Llorienzu’

Na madrugada del vienres al sábadu, el Centru d’Interpretación del Monte Deva va acoyer la Xornada pa la Observación de la Lluvia d’Estrelles de Les Perseides, conocíes como ‘llárimes de San Llorienzu’. Nella va poder visitase l’Observatoriu.
 
Esti fenómenu, que se vive del 16 de xunetu al 24 d’agostu nel hemisferiu norte, tien la so mayor intensidá estos díes, coincidiendo cola festividá de San Llorienzu, lo que llevó a recibir el nome popular de ‘llárimes de San Llorienzu’. Esta lluvia d’estrelles, que pue contemplase a simple vista ensin falta d’un telescopiu, produzse cuando la Tierra atraviesa la órbita del cometa Swift-Tuttle al so pasu alredor del Sol. El Monte Deva, en Xixón, ye un sitiu afayadizu pa disfrutar d’esti espectáculu que nos dexa’l cielu y, por ello, el Centru d’Interpretación municipal y la Sociedá Astronómica Asturiana Omega entamen estes xornaes abiertes a tol mundu.
 
Pa les 22 hores de vienres ta prevista una charra-debate entitulada 'Los meteoritos y la lluvia de Las Perseidas', na que miembros d’Omega van tratar esti tema d’una forma dinámica y entretenida. Tres esti actu, a partir de les 23 hores y hasta la 1 de la madrugada, tamién va poder visitase l’Observatoriu Astronómicu Municipal del Monte Deva en grupos de 15 persones, según l’orde de llegada. La visita va tener una duración d’unos 30 minutos y un guía de la sociedá astronómica va resolver toles duldes de los presentes. Otra manera, al mesmu tiempu, nel Centru d’Interpretación, tamién va poder disfrutase del Planetariu Viaxeru de La Caixa.