El ministru Moratinos confirma que l’asturianu nun va tener güecu na UE

La llingua asturiana va siguir fuera de los organismos de la UE, según reconoció ayeri'l ministru Miguel Angel Moratinos, que declaró na so visita a Asturies p'anunciar que la nuestra comunidá va ser onde se celebre "un gran foru internacional sobre inversión, cooperación y emigración n'Iberoamérica" que'l so Gobiernu nun pue defender n'Europa l'emplegu de les llingües que nun tienen calter de cooficiales nel territoriu onde se falen, en referencia al posible reconocimientu del asturianu na UE.

Moratinos pesllaba d'esta manera la polémica qu'entamare nel branu del 2004, cuando'l Conseyeru de Rellaciones Esteriores, Javier Valledor, en medio del debate pol reconocimientu n'Europa de les llingües cooficiales nel Estáu, unvió una carta al ministru d'Esteriores pidiéndo-y dalgún tipu de defensa y reconocimientu pal asturianu nes instituciones comunitaries. La carta esplicaba que l'ausencia del asturianu suponía una importante ausencia de la identidá asturiana como riqueza de la cultura española y europea y que, anque la llingua nun fuere oficial, el compromisu de protección, promoción y difusión de la llingua asturiana recoyíu nel Estatutu d'Autonomía del Principáu comprometía a les alministraciones na protección del idioma porque la carta estatutara ye "llei orgánica del estáu". La carta de Valledor llevare a ún puntu d'alta tensión les rellaciones ente los socios degobiernu asturianos, acusando Ana Rosa Migoya a Valledor de "tresgredir la realidá del Estatutu d'autonomía".