El ministru de Xusticia dexa'l cargu y abandona la política

Alberto Ruiz-Gallardón dexa la cartera de Xusticia, l'escañu y el so cargu nel Comité Executivu del PP tres la fracasada reforma de la Llei del Albuertu. Rafael Catalá será'l ministru nuevu.

Esta tarde, tres conocese la decisión del presidente del Gobiernu estatal, Mariano Rajoy, de retirar el polémicu anteproyeutu de la Llei Orgánica de Proteición del Concebíu y los Derechos de la Embarazada redautada pol Ministeriu de Xusticia, aprobáu en primer vuelta pol Conseyu de Ministros nel mes d'avientu y norma a la que l'Executivu pretendía dar lluz verde enantes del fin de branu, Ruiz-Gallardón convocó a la prensa p'anunciar la so dimisión de tolos sos cargos y d'abandonar la política activa, anque nun va dexar de militar nel Partido Popular (PP). El madrilanu afirmó nun ser la persona afayadiza pa llevar alantre la regulación nueva de la Llei del Albuertu que pretende agora Rajoy.

El secretariu d'Estáu d'Infraestructures, Tresporte y Vivienda, el tamién madrilanu Rafael Catalá ocupará la cartera de Xusticia que dexa Ruiz-Gallardón. Tomará la posesión del so cargu la selmana qu'entra, quedando como ministra en funciones la vicepresidenta estatal, Soraya Sáenz de Santamaría.