El Ministeriu de Xusticia entama los trámites pal indultu de Cándido y Morala

El delegáu del Gobiernu n'Asturies, Antonio Trevín, declaró ayeri que'l Ministeriu de Xusticia va solicitar los informes al xuez y a la fiscal qu'intervinieron nel casu contra los dos sindicalistes procesaos y presos polos estrozos materiales causaos nes movilizaciones de Naval Xixón, Cándido González Carnero y Juan Manuel Martínez Morala, pa pasar darréu a tramitar l'indultu.

Anque Trevín nun apurrió un plazu exactu pa la lliberación de los sindicalistes, comentó qu'elli mesmu informares favorablemente a la primer petición d'indultu que se tramitare dende Delegación de Gobiernu.



D'otra manera, y mientres ayeri se celebraba una nueva concentración de protesta en Xixón pidiendo la lliberación de los sindicalistes, el conceyu de Xixón anunciaba que solicitare formalmente la suspensión de la execución de la parte económica de la sentencia contra los sindicalistes, condenaos al pagu de 5.624 euros que Cándido y Morala alvirtieren que nun diben pagar. La midida quier posponer el pagu de la multa hasta que se resuelvan los recursos d'amparu y peticiones d'indultu.