El Ministeriu de Mediu Ambiente diz que se fizo lo correcho en Mumián

El Ministeriu de Mediu Ambiente dio de pasu'l treslláu del faisán de la braña de Mumián, según esplicó ayeri la Conseyería de Mediu Ambiente. Los servicios técnicos de la Subdirección Xeneral de Conservación de la Biodiversidá del Ministeriu de Mediu Ambiente dixeron testualmente nuna carta unviada a la Conseyería que "nun entienden" la polémica que se xeneró nos medios de comunicación pol tema del faisán y amiesten que'l Principáu cuenta y va siguir contando con tol sofitu d'esi departamentu nes sos acciones, incluyendo la cuestión del treslláu del faisán de Mumián a Pigüeña. La carta fírmala Luis Mariano González
Xefe del Serviciu d'Especies Amenazaes del Ministeriu y tamién la soscriben Fernando Ballesteros y
Luis Robles, coordinadores de los grupos de trabayu de la Estratexa Nacional pa la Conservación del Faisán Montés n'Asturies y Castiella y Llión. Los técnicos dicen na carta qu'estes operaciones yá se ficieron otres seyes vegaes nel estáu dende 1994, que tamién tuvieron d'aplicase en Francia y Alemaña, y que siempres que se llega a ello ye por guardar al animal de daños y separtalu de situaciones de peligru pa elli. Con too y con ello, los técnicos reconocen que sobre la esperiencia d'esti casu "paez aconseyable analizar el
procedimientu pa meyorar los protocolos d'actuación"


Otrabanda, el Conseyeru de Mediu Ambiente, Ordenación del Territoriu y Infraestructures, Francisco González Buendía, respondió ayeri ente'l Plenu de la Xunta Xeneral del Principáu, a delles entrugues sobre'l casu del faisán que formulare'l Grupu Popular.El Conseyeru defendió la competencia del Principáu para facer les actuaciones que-y abultaren oportunes y dixo que la operación foi de recoyida y non de captura, anque'l tratar col animal nestos términos lleva siempre con ello un riesgu. El Conseyeru negó la esistencia de programa nengún de radiomarcaxe de la especie y dixo que la tresparencia informativa nel asuntu foi siempres total.