El Ministeriu de Fomentu nun cumple cola llegalidá toponímica nel tramu Tapia-Navia de l’A-8

Los vecinos de Tapia, El Franco, Cuaña y Navia atopáronse’l vienres la sorpresa de l’apertura del tramu de l’A-8 ente Tapia y Navia. Sicasí, comprobaron que’l ministeriu continúa ensin cumplir cola llegalidá na materia de toponimia.
 
L’Asociación Culturar Xeira recuerda que, d’estos cuatro conceyos pelos que pasa l’Autovía del Cantábricu, El Franco tien la toponimia tradicional oficializada según el Decretu 35/2005 aprobáu pol Conseyu de Gobiernu espublizáu nel BOPA del 6 de mayu del 2005. Tres esta disposición, la denominación única de la capital del conceyu ye A Caridá en cuenta de la castellanizada La Caridad que, de forma incomprensible, ye la qu’apaez nos lletreros del tramu inauguráu recién. Mentes, sí se respeta’l topónimu oficial gallegu A Coruña, creando una discriminación clara ente los dos llingüés.
 
“A entrada en vigor das formas toponímicas oficiales supoñía úa adaptación progresiva en todas as señalizacióis y, por descontao, nas novas. En declaracióis repetidas polos responsables anteriores y actuales da Dirección Xeneral de Política Llingüística esplicábase que se taba trabayando pra qu'as formas toponímicas non solo se respetaran en vías de titularidá autonómica senón tamén nas del Estao. Polo que se ve, nel caso del Autovía del Cantábrico al sou paso pol occidente asturiano, nun deron ningún resultao”, apunten dende Xeira, coleutivu que reclama a la Direición Xeneral de Política Llingüística y a Gabino de Lorenzo, delegáu del Gobiernu estatal n’Asturies, “que medien pra que se respete a llegalidá y se reconoza na señalización viaria un patrimonio como el nome tradicional dos nosos llugares al que por fin se ye dera el aprecio que merecía”. Por últimu, afirma que “as lleis tán pra cumprillas y nun hai ningúa xustificación pra qu'as autoridades desconozan úa realidá qu'é oficial dende hai sete anos”.
 
Un trayeutu que se reduz a diez minutos
 
El tramu ente Navia y Tapia avera un poco más l’occidente col centru del país, al reducir el tiempu de viaxe ente les capitales d’estos dos conceyos hasta los 10 minutos de duración. Llama l’atención que l’apertura al tráficu d’estos 11,9 quilómetros d’autovía fixéronse ensin previu avisu y ensin actu protocolariu cola presencia habitual d’autoridaes.
 
Otra manera, pal mes marzu ta previsto que se terminen les obres de Las Dueñas-Muros. Los otros dos tramos pendientes de l’A-8 nel so pasu pel territoriu asturianu van tardar tovía más d’un añu, yá que, si nun hai retrasos nuevos, Otur-Villapedre y Llanes-Unquera, l’últimpu pendiente nel oriente, van tar operativos pa finales del 2013.