El Ministeriu da-y prioridá a la regasificadora del Musel

El Ministeriu d'Industria asoleyó ayeri la reforma del Plan Enerxéticu Nacional. Nella, la regasificadora d'El Musel pasa a tener prioridá "A" y tendría que tar funcionando nel añu 2012

Agora la regasificadora, planta encargada de devolver a presión y temperatura normales el gas natural que-y llegue conxelao en barcos especiales pa tresporte de gas, namás depende alministrativamente de pasar per trámite en Congresu de Ministros, pero de cualquier manera, esta pieza que podría furnir de gas a delles centrales térmiques n'Asturies depende según el Gobiernu asturianu pa la so viabilidá de que se construyan les protestadísimes llinies d'alta tensión Lada - Velilla y Ribera-Penagos que tien proyectada la empresa Rede Eléctrica pa evacuar la corriente dende Asturies pa contra la meseta.


Énte la llegada de la regasificadora, grupos conservacionistes protesten polo que-yos abulta una instalación peligrosa y que va marcar más la dependencia d'Asturies de fontes enerxétiques importaes. Anque los grupos como la Coordinaora Ecoloxista ven delles ventayes na llegada del gas, sobremanera en cuantes que pue menguar l'efectu contaminante que tien la dependencia del carbón del parque eléctricu astur, ello ye que la regasificadora tamién lleva arreyaos riesgos. La dependencia pal suministru de países con rexímenes políticos inestables nun contestu de xuba del preciu del petróleu que pue llevar a que'l gas dexe de ser competitivu ye ún d'ellos, neto que'l fechu de sustituyir carbón por gas va facer que'l desarrollu de les fontes alternatives de corriente quede allancáu, pero la Coordinadora tamién ve un peligru más físicu y inmediatu como ye'l fechu de los incendios y accidentes que puen dase nuna instalación d'estes característiques, ell col agravante de que la planta va asitiase nel centru d'un área que tien más de 80.000 habitantes en menos de 6 kilómetros cuadraos. La presencia na Campa Torres de les bombones d'almacenamientu de Gases licuaos del Petróleu de Repsol supón un riesgu amestáu al poder españar estes por simpatía en casu d'accidente, según da a a entender la Coordinadora.