El miércoles fina’l plazu p’apuntase al cursu básicu d’asturianu qu’entama’l Conceyu de Corvera en Les Vegues

Esti miércoles va principiar el Cursu Básicu de Llingua Asturiana de baldre qu’entama’l Conceyu de Corvera. Esi mesmu día ye’l caberu pa formalizar la inscripción nel Centru Sociocultural de Les Vegues.

Rafael Rodríguez Valdés, téunicu responsable de la Casa de la Llingua, va encargase de dar les clases d’una edición nueva d’esti cursu que quier ser “un mecanismu de deprendimientu de les normes básiques d’escritura del idioma, pero tamién una manera d’acercase a tantos d’aspectos de la cultura asturiana”. Asina, los temes a tratar van ser ‘Historia de la llingua asturiana’, ‘La llingua asturiana: léxicu, sintaxis y morfoloxía’, ‘Normes ortográfiques’, ‘Introducción a la toponimia de Corvera’ y ‘Cine, lliteratura y música n’asturianu’.

Les clases van dase tolos miércoles, de 18 a 20 hores, nel Centru Sociocultural de Les Vegues. La duración total del cursu ye de 30 hores, que se dividirán en 15 xornaes, y tolos alumnos recibirán un diploma d'asistencia.