El meyor once na historia del fútbol asturiano, a alderique

|
Cartelu 'Cuál es el mejor once en la historia del fútbol asturiano'

La revista Atlántica XXII entama un actu dedicáu al deporte con más siguimientu.

La uvieína La Salvaje (Martínez Vigil, 9) va acoyer mañana l'alderique '¿Cuál es el mejor once la historia del fútbol asturiano?'. Cola escusa d'escoyer a los futbolistes más destacaos de los más de cien años d'historia del nuesu fútbol, los convidaos y el públicu van falar dende les 20 hores sobre esti xuegu que vieno dende Inglaterra pa quedase, tratando los temes siempre d'una manera risondera y desenfadada.

David Remartínez, direutor d'Atlántica XXII, va encargase de moderar l'eventu, nel que van participar Miguel Fernandi, comentarista de RPA; Sita Méndez, presidenta de Femiastur; María Xosé Martínez, presidenta del Rosal; y Pablo R. Guardado, redautor d'Asturies.com. Toos ellos yá presentaron el so once tipu, xunto con un téunicu y cinco suplentes, mentes que los asistentes van poder facelo dende una hora enantes del comienzu del alderique nuna urna instalada nel chigre.

La eleición del mesmu ye abierta dafechu, ensin tener en cuenta xéneros, palmarés o époques. Ente tolos participantes va sortiase una suscripción anual a Atlántica XXII, que se va anunciar al final del actu, xunto col resultáu de les votaciones.

Con esti alderique, la revista asturiana de periodismu d'investigación da continuidá a esti formatu pa tratar temes de gran interés pa los asturianos no que se refier al so ociu. En xineru yá entamara ún en La Salvaje pa escoyer al meyor grupu de música de la historia d'Asturies.

Contador Estadistiques