El meyor llibru del 2021 ye ‘Onde’l caos se texe y se destexe’ de Viejo pa la Tertulia Malory

|
Pablo Antón Marín Estrada, Xulio Viejo y Esther Prieto presentación de 'Onde’l caos se texe

La cuarta novela de Xulio Viejo, ‘Onde’l caos se texe y se destexe’ (Ediciones Trabe), recibe’l reconocimientu de la Tertulia Malory como meyor llibru n’asturianu espublizáu nel 2021, añu d'una producción lliteraria de gran calidá. Nes once ediciones d’esti gallardón que vien entregándose dende’l 2012 nengún autor repitió como ganador.

Los escritores Xulio Arbesú, José Luis Rendueles, Solinca Turbón, Roberto Corte, Aique Fernandi, Beatriz Quintana, David Fernán, Chechu García y Henrique G. Facuriella conformaron esti añu’l xuráu, qu’aconceyó na tarde del vienres nun actu celebráu pola tertulia lliteraria del Pub Tom Malory de L’Entregu, activa dende l’añu 1998. Llueu d’una votación apretada, ‘Onde’l caos se texe y se destexe’, resultó finalmente escoyida.

“Amuesa una narrativa híbrida d’un valir lliterariu altu, qu’afita de forma perfecha’l camín de lo universal a lo llocal, siendo quién a empatar a historia familiar con un territoriu míticu y, al empar, real, como ye Quirós, y que furrula como una métafora d’Asturies y del orixe mesmu de la cultura occidental”, rescampla l’acta del xuráu, que tamién fai referencia la calidá tan grande de la producción lliteraria n’asturianu del añu 2021, una tendencia habitual nos años últimos. Viejo va recibir en L’Entregu nuna fecha entovía por confirmar una ilustración d’Alfonso Zapico y una medaya conmemorativa como recompensa.

Nacíu n’Uviéu nel añu 1968, l’autor ye doctor en Filoloxía Románica, profesor de la Universidá d’Uviéu y estudiosu de la llingua y la lliteratura asturianes. Previamente espublizara otres trés noveles: ‘Na llende del condicional perfeutu’ (1990), ‘Les falcatrúes del demoniu’ (1992) y ‘Los araxales de la vida’ (2001).

‘Onde’l caos se texe y se destexe’ “constitúi una historia d’histories rica, que se llevanta como una reflexón emocionante sobre la cultura, el poder, la resistencia y una busca del sentíu que se-y pue dar a la existencia. La memoria escrita como homenaxe a un padre que baxa de los montes de Quirós a ganar la vida en Ventanielles y que va ser la cadena que nos caltién xunto a los nuestros y a lo nuestro, dientro d’una cosmovisión asturiana y universal emocionante que nos plasma y nos trescala”, rellaten dende la Tertulia Malory.

Los ganadores

Con Viejo, once autores ganaron hasta’l momentu esti gallardón creáu nel añu 2012. Enantes fixérenlo Xabiero Cayarga, con ‘La neve del cuquiellu’ (2011); Ruma Barbero, con ‘La Chelita’ (2012); Milio Rodríguez Cueto, con ‘Carne de melandru’ (2013); Consuelo Vega, con 'Más espeso que l'agua' (2014); Ángeles Carbajal, con 'L'aire ente la rama' (2015); Francisco 'Paco' Álvarez, con 'Lluvia d'agostu' (2016); y Raquel F. Menéndez, con 'El llibru póstumu de Sherezade' (2017); David Artime, con 'Incorrectos' (2018); Antón García, con ‘Memoria de Tuña’ (2019); y Xuan Bello, con ‘Les isles inciertes’ (2020).

Na semeya, Viejo –nel centru– na presentación de la obra na Llibrería Trabe n'abril xunto con Pablo Antón Marín Estrada y Esther Prieto.

Contador Estadistiques