El Mercáu del Ganáu de La Pola Ḷḷena acueye esti sábadu'l II Palitu Rock

Tres l’ésitu que tuvo la primer edición, el Palitu Rock torna a celebrase esti sábadu en La Pola Ḷḷena de baldre. Nesta ocasión, destaca la presencia de los andaluces El Noi del Sucre y de los madrilanos San Blas Posse.
 
Rolando Díaz, conceyal de Cultura, Mocedá, Turismu, Educación y Política Llingüística, presentó güei la segunda edición d’esti ‘festival del pueblu pal pueblu’, como reza’l lema del Palitu Rock, xunto con integrantes de l’Asociación Recreativa y Cultural Palitu, coleutivu qu’entama esti conciertu. El Conceyu de Ḷḷena collabora na organización del festival “mostrando apoyu a la música como alternativa d’ociu, y a la música en direutu en particular”.
 
Los conciertos, que tienen entrada llibre, van principiar a les 17.30 hores nel Mercáu de Ganáu de La Pola Ḷḷena y van allargase hasta les 5 de la madrugada. El cartel d’esti añu ta compuestu por Electrokutazión (17.30 hores), Ahí se Pudran (18.45 hores), Karne Kruda (20 hores), San Blas Posse (21.15 hores), Akrata (22.30 hores), Expropiazión (23.45 hores), El Noi del Sucre (1 de la madrugada), Fiemo (2.45 hores) y Antivalium (4 hores). Los gallegos d’El Pito de Pikasso, anunciaos nun primer momentu, nun van poder tomar parte nel Palitu Rock por causes ayenes a la organización.