El mayor portaaviones francés vien al desguace a Xixón

Una empresa asturiana de desguaces ta acabante de mercar el portaaviones de la marina francesa "Clemenceau" pa facer chatarra de les sos 24.000 tonelaes de pesu. El barcu, botáu en 1.957, yera daquella'l portaaviones más grande d'Europa, con 267 metros d'eslora, un llargor qu'igual acaba obligando a desguazalu n'otru puertu, anque de momentu la nave vien remolcada dende Toulon camín d'El Musel (Xixón) onde esperen por ella pa primeros del mes qu'entra

Aparte de ser el mayor desguace na historia d'Asturies, la singularidá histórica del barcu da-y un aquello especial a la operación. La mesma empresa yá menguare a cachinos una fragata británica que participare na Guerra de las Malvinas, pero la historia del Clemenceau ye entovía más impresionante. En 37 años de serviciu, el Clemenceau participó en prebes nucleares, asistió a la guerra Iran-Irak, participó na primer Guerra del Golfu de 1991 y dio-yos sofitu a les operaciones de la KFOR en Yugoslavia. precisamente a la vuelta de Yugoslavia nel 97 l'exércitu francés mandó desarmar el barcu, que quedó en Toulon pa furnir de repuestos al so ximielgu el "Foch" anguaño portaaviones de la marina brasileña. Anque esistió un proyectu pa fundilu y convertilu en criaderu de pexes y mariscu en Marsella, la idega quedó pa prau por cara y polos problemes mediuambientales que presentaba, y ye que'l Clemenceau ta estráu de materiales peligrosos, incluyendo tonelaes d'amiantu.