El llunes ye’l día caberu pa formalizar la matrícula pal V Curso de Llingua y Cultura del Navia-Eo

Del 15 d’ochobre al 28 de payares va impartise en Navia’l V Curso de Llingua y Cultura del Navia-Eo. Les clases van tener llugar los martes y xueves de 17 a 20 hores, y el día caberu pa formalizar la matrícula ye’l llunes, 30 de setiembre.

La Fundación Parque Histórico del Navia entama esti cursu, que forma parte del Plan d’Actuacióis de la Oficina Cultural y Llingüística del Parque Histórico del Navia en materia de normalización social del Gallego-asturiano pal 2013, gracies a la collaboración de l’Academia de la Llingua Asturiana (ALLA) y del Conceyo de Navia. Nél los alumnos van dar delles materies impartíes por espertos nel tema, tratando asuntos como la iniciación a la gramática del gallego-asturiano, la lliteratura y sociollingüística del eonaviego, la mitoloxía nel Navia-Eo, les esperiencias de normalización llingüística, la fala na música contemporánea, la lliteratura infantil y les esperiencias docentes, el patrimoniu industrial del Navia-Eo y los oficios tradicionales.

Asina, la nómina de profesores que van participar nel V Curso de Llingua y Cultura del Navia-Eo ta compuesta por Iván Iglesias, Ruth González García, Xosé Miguel Suárez Fernández ‘Tapia’, Belén Rico, Ágata García Castro, Ricardo Saavedra y Rafael Cascudo. Les clases van tener llugar nel Espacio Cultural El Liceo les tardes de los martes y xueves, n’horariu de 17 a 20 hores, y les persones que completen el cursu, que ta acreditáu pola ALLA, van recibir un Certificao d’Aprovetamento (de 11 a 14 sesiones; con 7, entregaráse un Certificao d’Asistencia). Navia releva a El Franco y a Tapia como sede d’esta iniciativa ésitosa.

Les persones interesaes en tomar parte del cursu han d’entregar enantes del llunes na sede de la Fundación Parque Histórico del Navia (Las Veigas 13 baxo, Navia) el formulariu d’inscripción, que se pue descargar na so web o al pie d’esta noticia, xunto col xustificante bancariu del pagu de la matrícula en conceptu de ‘matrícula curso llingua’. El preciu ye de 28 euros y l’ingresu ha de facese nel númberu de cuenta 2048-0037-66-3400024994 de CaxAstur.