El llunes principien en Gascona les Xornaes X Aniversariu de la Sidra d’Escoyeta

La sidra fecha con mazana seleicionada cumple diez años y los llagareros que faen esta sidre con certificáu de calidá van celebralo con dellos actos pel tol país. El primer d’ellos va ser unes xornaes en Gascona del 4 al 8 d’abril.
 
Dende’l llunes y hasta’l vienres, el bulevar de la sidra uviedín va acoyer delles actividaes relacionaes cola sidra d’escoyeta que faen los llagares Trabanco, Peñón, Foncueva y Muñiz. La más destacada ye la oportunidá de prebar la primer sidra del añu, ensin trasiegar, de los trece toneles qu’algamaron el notable na primer mesa celebrada’l 21 de marzu na sidrería Villaviciosa, cola posibilidá de sumar una cazuelina con productos gastronómicos fechos por cada chigre de Gascona de forma especial pa les xornaes por namái 3 euros. Un preciu más que popular.
 
Les sidreríes tamién van acoyer delles tasties guiaes de cada ún de los llagares de la sidra fecha con 20 variedaes de mazana autóctona. La primer d’elles va ser el martes, a les 20 hores, en La Pumarada con sidra d’escoyeta, a la que van siguir dos el miércoles: a les 19 hores, en La Noceda, con Foncueva; y a les 20 hores, na Asturias, con Peñón. Pal xueves ta prevista otra tastia guiada na Villaviciosa, a les 19 hores, con Muñiz; y en Tierra Astur, a les 20 hores, con Trabanco. La sidrería El Pigüeña va zarrar el vienres esta actividá, que ye de baldre previa inscripción –con aforu acotáu–, a les 19 hores, con sidra d'escoyeta.
 
Pero quiciabes el mayor aliciente d’estes xornaes, que van inaugurase’l llunes a les 12 hores cola presentación de la collecha 2010 de la sidra fecha con mazana seleicionada, ye la posibilidá de ser ún de los 50 privilexaos que van poder realizar el I Tour de la Sidre d’Escoyeta. Tolos díes van sortease pases VIP ente los clientes de Gascona pa vivir una xornada temática alredor de la sidra qu’inclúi visites a les pumaraes de Trabanco, Peñón, Foncueva y Muñiz, un taller sobre la ellaboración de sidra, tasties guiaes y clases d’aniciación al escanciáu, ente otres actividaes.