El llargumetraxe ‘Un contrato extraño’ llevó trés premios nel VIII Festival de Cine Asturianu

Meyor película, meyor actor y meyor actriz. ‘Un contrato extraño’, de Teresa Marcos, resultó la cinta trunfadora del VIII Festival de Cine Asturianu, certame celebráu la selmana pasada nel Teatru Filarmónica qu’homenaxeó al actor Frank Braña.

La realizadora de Cangues, premiada n’otres ediciones del certame polos curtiometraxes ‘Lencería de ocasión’ y ‘Por estar contigo’, céntrase nesti llargumetraxe na prostitución masculina, recreando unos personaxes “que xueguen ente la realidá y la ficción al traviés d’unos diálogos mui creíbles, dientro too ello d’una cierta escuela mui repetida en tol cine asturianu en xeneral que podemos clasificar como de realismu cinematográficu”, señalen dende la organización. Amás del Premiu al Meyor Película, ‘Un contrato extraño’ tamién llevó’l Premiu al Meyor Actor, gracies al papel interpretáu por David S. Cabal, y el Premio a la Meyor Actriz, que foi pa Olga Montero.

Completaron el palmarés del VIII Festival de Cine Asturianu ‘La mujer del hatillo gris’, del uviedín Luis Trapiello, cinta “con un guión inspiráu na represión exercida pol franquismu nes cárceles mientres la posguerra”, col Premiu al Meyor Curtiumetraxe; ‘Sombra’, “un testimoniu gráficu de les muyeres socialistes militantes de la JSU que sufrieron la represión y tortura depués de la Guerra del 1936” del uviedín Juan Caunedo, col Premiu al Meyor Documental; y Frank Braña, de manera póstuma, col Premiu d’Honor. El xuráu encargáu de decidir el fallu de caún de les categoríes tuvo compuestu nesta ocasión polos realizadores Juan José Bors y Moisés Tuñón, y Isabel Friera, de la Unión d’Actores d’Asturies. Encargóse d’entregar los premios na gala del Filarmónica’l direutor y cineasta Manuel Curiel, biógrafu de Frank Braña.