El Llaboratoriu de Viroloxía analiza 3.690 pruebes PCR nun día

Ye la cifra más alta dende l'entamu del andanciu de COVID-19. 80 dieron positivu nuna xornada na que se rexistró un fináu.

Asturies algamó ayeri'l númberu máximu de pruebes PCR feches nun día: 3.690. Con diez biltos activos, son numberoses les pruebes feches pol Llaboratoriu de Viroloxía del Hospital Universitariu Central d'Asturies (HUCA) venceyaos a ellos.

El númberu total de contaxaos comunicaos pola Conseyería de Salú na xornada quedó en 80, 79 según los datos oficiales, corrixendo asina'l de más que s'informó'l martes. La edá media de les personas afectaes ye de 43 años y tienen toos síntomes leves o son asintómaticos, a esceición d'una persona que foi hospitalizada.

Produxéronse amás otros trés ingresos hospitalarios nuevos, al qu'hai que sumar otru na UCI, que se correspuenden con casos diagnosticaos en díes previos. Nestos momentos, según los datos oficiales, hai 10 persones n'intensivos y 33 en planta.

Otra manera, hai que llamentar una muerte, la 347 dende l'entamu del andanciu de COVID-19. Trátase d'un home de 86 años ensin venceyu con centru residencial sociosanitariu nengún.