El Lealtad lleva a los penaltis la so primer Copa Federación

|
Lealtad campeón de la Copa Federación 18-19

La final de Mieres col Sporting B decidióse dende los once metros tres llegar a la conclusión del tiempu reglamentariu con 1-1.

Como se suel dicir, a la tercera foi la vencida. El Lealtad proclamóse campeón de la Copa Federación per primer vegada na so historia tres disputar dos finales previes y clasifícase asina a la fase estatal, onde tamién participa l'UP Langreo tres quedar elimináu en Copa del Rei pola UD Logroñés en primer ronda.

Nun hebo sorpreses nes alineaciones, col Lealtad col so once tipu y col filial del Sporting dando minutos a xuveniles y menos habituales. Los primeros en golpiar foron los xixoneses, nel minutu 14 por mediación de Chiki, pero los maliayos, que tardaríen en reaicionar, empataron nel 63 gracies a Robert nuna segunda xugada tres en saque d'esquina.

Los dos equipos tuvieron opciones pa desfacer l'empate, anque'l marcador nun se movería y el títulu pasaría a disputase dende'l puntu de penalti. Javi Porrón convirtióse nel héroe del partíu al detener los llanzamientos de Gorka Santamaría y de Chiki, mientres que pel Lealtad namái Pelayo Pedrayes falló'l so disparu.

Contador Estadistiques