El Lealtad-Caudal con más urxencies, n'asturianu en RTPA

Dambos equipos necesiten la victoria p'averase a los puestos de permanencia.

Nun tán diendo-yos bien les coses nin al Lealtad nin al Caudal esta temporada nel grupu 2 de Segunda División B, en posiciones de descensu y cola permanencia cada vegada más alloñada nuna tabla clasificatoria qu'amenaza con frayar perbaxo. El de Villaviciosa ye'l conxuntu más cercanu a la salvación, con 15 puntos, a seis del puestu de promoción que marca'l Real Unión y de la salvación, el Vitoria.

El Caudal, mentes, ocupa la plaza cabera con 13 puntos. Dos situaciones d'urxencia que faen d'esti duelu asturianu na categoría un partíu clave pa dos equipos que nun pueden permitise más fallos.

El choque va celebrase'l domingu al meudía en Les Caleyes y va poder vese y sentise n'asturianu per RTPA. Na televisión la narración va ser de Fernando García de Dios, con Nacio González a los comentarios, mentes que na radio pública va tresmitir el choque Miguel Fernandi.

Na semeya, Les Caleyes.