El IX Salón del Llibru Asturianu abre les sos puertes en Xixón

Esti vienres celebróse la inauguración del IX Salón del Llibru Asturianu que va acoyer Xixón hasta’l 4 de setiembre. Nél va esponese gran parte del fondu bibliográficu de les editoriales del país, con más de mil títulos n’asturianu y castellanu.
 
A les 12 hores tuvo llugar l’actu d’inauguración, nel que tuvieron presentes Ángela Sanchez Vallina, presidenta del Gremiu d’Editores d’Asturies; Carlos Rubiera, conceyal de Cultura, Educación, Festexos y Mocedá del Conceyu de Xixón; y Alfredo Ignacio Álvarez, direutor xeneral de Política Llingüística, que ratificó l’apoyu del so Gobiernu a la lliteratura fecha n’asturianu. L’oxetivu d’esti certame ye dar a conocer “la riqueza y calidá del llibru editáu n’Asturies”, pa lo que’l Gremiu d'Editores d'Asturies instaló una carpa de cien metros cuadraos na cai Francisco Tomás y Valiente. L’horariu d’apertura del Salón va ser 11 a 14 hores y de 17 a 21 hores, de llunes a vienres; y de 11.30 a 14.30 hores y de 16.30 a 21.30 hores, sábados y domingos.
 
Amás de venta de llibros, el Salón tamién va acoyer presentaciones, firmes y otres actividaes. Asina, el xueves 1 de setiembre, a les 19 hores, Lluis Antón González va representar monólogos de Cristina Muñiz Martín recoyíos na so publicación ‘¡Qué te preste!’ y d’Inaciu Galán y González. Pal sábadu 3 de setiembre, a les 20 hores, Marián García y Xurde Fernández van presentar ‘Febreru 29’.