El IV Primer Sidre l’Añu va enllenar de folixa’l Pueblu d’Asturies

El tendayu del Muséu del Pueblu d’Asturies acueye per cuartu añu consecutivu’l Primer Sidre l’Añu. Dende’l xueves, y hasta’l domingu, la bébora tradicional va protagonizar un certame qu’axunta folixa, deporte tradicional y música.

Como ye vezu, la mayor parte de los llagares del país participen nesta celebración entamada pola revista La Sidra y pola Fundación Asturies XXI que pretende recuperar la tradición de celebrar espiches por estes feches y situar a Xixón como la capital sidrera mundial. Por un preciu de 5 euros, tolos asistentes van poder prebar sidra de dientro y de fuera d'Asturies, y asistir a charres, tasties guiaes, exhibiciones, esposiciones o actuaciones musicales, ente otres actividaes. Un programa bien bayurosu qu'avera la folixa cola cultura.

Dientro de les actividaes que se repiten añu tres añu, destaca la celebración del IV Asturiana y Sidre, que va tener llugar el vienres y el sábadu a partir de les 16 hores. Na primer xornada van actuar los alumnos d’asturianada de la Escuela de Música Tradicional La Quintana, a cargu d’Ismael Tomás, y María Luisa Martínez (Xixón), Cristina Sánchez (Peñamellera), Ruben Barredo (Villaviciosa), Adolfo Menéndez (Llanera), Álvaro Fidalgo (Llanera) y María Luisa Álvarez (Llanera). Mentes, el sábadu, van xubise al escenariu del tendayu los alumnos de la Escuela de Música Tradicional Manolo Quirós, a cargu d’Anabel Santiago, y Alicia Villanueva (Bimenes), Eva María Galán (Cangas del Narcea), Amante Méndez (Cangas del Narcea), Jonatan Meana (Xixón) y Odón García (Uviéu). Llorián García va acompañar a la gaita a toos estos artistes, que van interpretar, como ye vezu, cantares venceyaos cola sidra en llingua asturiana.

Un concursu que repite, depués del ésitu de la edición pasada, ye’l de sidre casero fecho en maera, empobináu a llagareros non profesionales qu'empleguen el sistema tradicional en pipa de maera. L’oxetivu d’esta iniciativa ye promocionar la ellaboración de sidra nesti material a lo llargo de toda l’Asturies histórica. Ésti va celebrase’l domingu, a les 12.30 hores.

Llagares d’Asturies y d’otros paíes

La llista de llagares participantes nesta edición del Primer Sidre l’Añu ye la siguiente: Acebal, Alonso, Arbesú, Breceña, Buznego, Casería San Juan del Obispo, Castañón, Champanera de Villaviciosa, Corzo, El Duque, El Fugitivo, El Güelu, El Piloñu, El Cerezo, El Gaitero, El Traviesu, Escanciador, Estrada, Llagar de Bernueces, Buznego, Fonciello, Frutos, Gelo, Germán, Guimarán, Herminio, J. R., J. Tomás, Juanín, La Llarada, Los Angones, Los Gemelos, Los Serranos, Mayador, Masavéu, Menéndez, Montequín Laiz, Muñó, Pamirandi, Panizales, Peñón, Piñera, Quelo, Riestra, San Juan del Obispo, Segundo, Solleiro, Vallina, Vigón, Viuda de Angelón, Viuda de Corsino, Viuda de Palacio, Zapatero y Zarracina. Los asistentes tamién va poder prebar dellos tipos de sidra de fuera d’Asturies, como la d’El Pomar de Gredos (Castilla); la de Kelterei Nöll GMBH, Jörg Stier y Possmann (Alemaña); la de Kerisac, St. Charles, Ecusson, Bigouden y Valderance (Breizh); y la de Mad Apple (República Checa). P’acompañar la sidra, la organización va disponer de dellos puestos onde poder adquirir arrozaes, costielles, chorizu colloráu y criollu, asina como llambionaes varies. L'horariu d'apertura del recintu ye de 12 a 22 hores, a esceición del domingu, cuando'l Primer Sidre l'Añu va zarrar les so puertes a les 19 hores.