El IV Mercáu Marineru de Llastres va incluyir un alcuentru coral ente les sos munches actividaes

Los díes 11, 12 y 13 d’agostu, Llastres va acoyer una edición nueva del Mercáu Marineru. Como novedá d’esti añu, el certame va entamar el domingu’l I Alcuentru Coral de la Mar ‘Brises del Cantábricu’.
 
El Paséu la Ilesia y el Parque de Llastres son los dos puntos de la población onde va instalase’l mediu centenar de puestos de venta y d’esposición de productos artesanales y agroalimentarios, asina como una amusea d’oficios vieyos venceyaos cola mar. Amás, esti mercáu entamáu pol Área de Cultura del Conceyu de Colunga cola collaboración de la empresa Eventos Nordés va contar con actividaes paraleles como animación teatral –ente les que destaca la escenificación, per capítulos, de la obra de Mar Rojo Producciones ‘Invasión Pirata’–, talleres, actuaciones de música tradicional y la celebración del V Concursu de Bolos de Cuatriada Individual qu’entama la Peña Bolística Manín.
 
La novedá principal d’esta cuarta edición del Mercáu Marineru de Llastres va ser el I Alcuentru Coral de la Mar ‘Brises del Cantábricu’ que va tener llugar el domingu, a partir de les 20.30 hores nel quioscu la música. L’Asociación Cultural Manín de Llastres entama esta actividá na que van participar la Coral Las Almenas, de Veiga, y el propiu Coro Marinero Manín.