El III Cursu de Llingua y Cultura del Navia-Eo va tener Tapia como sede a partir del martes 29

El salón d’actos del Conceyo de Tapia va acoyer, ente’l 29 de payares y el 24 de xineru, el III Cursu de Llingua y Cultura del Navia-Eo. Ésti ye de baldre y va celebrase los martes y xueves de 17 a 20 hores.
 
El Conceyo de Tapia, cola collaboración de la Fundación Parque Histórico de Navia, entama esta iniciativa que garra’l relevu de los celebraos nel 2008 y 2010 n’El Franco. Nél, los alumnos y alumnes van poder alfabetizase en gallego-asturiano amás de recibir clases y ponencies “sobre diferentes materias, como a literatura y sociolingüística del galego-asturiano, esperiencias de normalización lingüística, el galego-asturiano na música, recursos naturales del Navia-Eo, literatura infantil y esperiencias docentes cos nenos, oficios tradicionales...”. Pa ello, ta prevista la participación de dellos profesores especializaos a lo llargo del cursu, como Xosé Miguel Suárez ‘Tapia’, Belén Rico Prieto, Noelia Bermúdez, José Antonio Pasarón, Ricardo Saavedra o Iván Iglesias Fernández.
 
Los interesaos en participar nesti cursu de baldre han de ponese en contautu, enantes del 28 de payares, nel teléfonu 985.624.821 –entrugar por Iván Iglesias– o na direición cultural@parquehistorico.org. El tope d’alumnos y alumnes del cursu ye de 25.