El Gumial entama en Morea'l IV Alcuentru Folclóricu n'Ayer

La Nueche Folk va contar coles actuaciones de Dixebra, Tuenda y La Tarrancha.

Morea va tar de folixa al rodiu la música esta fin de selmana. Ente güei y el domingu esta población ayerana va contar con bandes de gaites, una Nueche Folk, bandines tradicionales y hasta una verbena.

Celébrase'l IV Alcuentru Folclóricu n'Ayer, qu'entama la Banda Gaites El Gumial y que, añu a añu, sigue medrando. L'apertura del Mercáu Mineru a les 17 hores va abrir les actividaes previstes y a les 19 hores Santi Caleya va lleer el pregón, pa siguir de nueche con música actual con Eclipse Espectáculos y un pinchadiscos.

El Festival de Bandes de Gaites va tener llugar el sábadu a les 20 hores, tres un desfile de les agrupaciones participantes a les 18 hores. Los convidaos nesta edición son la Banda Gaites Villaviciosa-El Gaitero, la Banda Gaites Camín de Fierro, la Banda de Gaites Noega y la berciana Banda de Gaitas Castro Bérgidum, amás d'El Gumial.

A les 23 hores va comenzar la Nueche Folk, con bandes de trés estilos diferentes. Asina, van xubir al escenariu'l tríu de folk tradicional Tuenda, la banda de mecigayuska La Tarrancha y la de folk-rock Dixebra.

El domingu va ser el turnu de les bandines tradicionales, que van amanizar el Mercáu Mineru pela manaña. A les 15 hores va entamase una gran paellada, pa finar les actividaes a les 18 hores col concursu de pareyes de gaita y tambor, que va tener como sede'l Teatru El Carmen.