El Guijuelo anuncia n'asturianu'l so partíu col Vetusta del domingu

El conxuntu salmantín recibe al filial uvieín na segunda fase de la Segunda División B.

'Nun diximos la nuesa postrera palabra. La nuesa casa, los nuesos puntos'. Con esti testu promociona'l Guijuelo el so partíu col Vetusta del domingu, acompañáu d'una imaxe d'una botella echando sidra nun vasu y, yá en castellanu, el restu de la información sobre'l choque que va tener llugar el domingu al meudía.

Finada la primer fase na Segunda B, el filial del Uviéu (21 puntos), el CD Lealtad (20), el Sporting B (16) y el CD Covadonga (14) van competir pola permanencia –en realidá por una plaza na Segunda RFEF, la que va ser la cuarta categoría del fútbol estatal– xunto con Pontevedra (21), Coruxo (20), Salamanca CF (19) y Guijuelo (12), con trés places en xuegu –namái'l peor terceru de los cinco grupos tamién baxaría– . Mentes, l'UP Langreo (25) y el Club Marino (22) clasificaron xunto col Numancia (25) pa lluchar polo dos puestos que dan billete l'añu qu'entra en Primera RFEF –escalón previu a LaLiga, que va contar con dos grupos de 20 equipos– con Deportivo (29), Racing Club Ferrol (27) y Compostela (25).

Los puntos algamaos na primer fase contabilicen pa la segunda, onde los equipos van enfrentase, ida y vueta, namás colos equipos del grupu contrariu.

Tercera División

Ayeri celebróse la xornada que faltaba nel grupu 2B de Tercera División, na que'l Llanes algamó'l derechu a competir pol ascensu tres ganar 0-3 al Valdesoto. Asina clasifiquen L'Entregu (40 puntos), l'EI San Martín (33) y el conxuntu del oriente (32) xunto colos trés primeros del otru grupu: UC Ceares (44), Avilés Industrial (40) y Llanera (38).

Los dos primeros van xubir de manera direuta a la Segunda RFEF, mentes que los restantes van xugar les eliminatories pol ascensu xunto colos dos meyores de los clasificaos ente'l cuartu y el sestu de la fase regular: Caudal (38), UD Gijón Industrial (27) y la SD Lenense (25) nel A, y CD Tuilla (27), Real Titánico (23) y Urraca (22) nel B. Hai que recordar que l'A tuvo formáu por 11 equipos y el B por 10, polo que pa la clasificación final va mirase'l coeficiente (puntos por partíu xugáu).

Por último, van xugar polos cuatro puestos que dan la permanencia no que va ser la Tercera RFEF Praviano (24), Navarro (22), Mosconia (20), Vallobín (17) y Avilés Stadium (12) pol A, y Condal (22), Colunga (20), Siero (15) y Valdesoto (12) pol B.