El grupu Tejedor anuncia que dexa los escenarios

Creáu polos hermanos Tejedor nel 1995, yera una de les bandes folk más destacaes d'Astuies, con sonadía a nivel internacional.

Casi 25 años depués de comenzar a tocar y con más 600 conciertos nel llombu, Tejedor aparca los instrumentos. Failo con una anuncia al traviés de les redes sociales nel que nun dexa nidios los motivos, centrándose n'agradecer a toles persones que-yos acompañaron nesti camín.

José Manuel, Javier y Eva Tejedor foron l'alma d'un grupu que llevó la música asturiana pel tol mundu. El so debú discrográficu foi nel 1999, con 'Texedores de sueños', al que siguieron 'Llunáticos' (2003), 'Música na maleta' (2006) y 'Positivu' (2011), últimu de la carrera y primeru nel que nun apaez la voz d'Eva.

Silvia Quesada sustituyiría dende esi momentu nos direutos a la parte femenina de Tejedor, que contó colos músicos Alberto Ablanedo (bouzouki), Rubén Álvarez (guitarra acústica), Ramón González Morán (teclaos), Horacio García (contrabaxu) y Jesús Castro (batería) nes sos últimes formaciones, con César Ibarretxe como téunicu de soníu. Dende'l grupu llamen na so despidida respetu al nome Tejedor pidiendo que "nunca faléis o vos aprovechéis d’esta marca p’anunciar daqué que’l públicu nun va presenciar".

Na semeya, José Manuel y Javier Tejedor.