El Grupu Señaldá va participar nel festival bretón Tro An Dans

La población bretona de Trébeurden va acoyer esti sábadu y domingu’l Festival Tro An Dans, entamáu pola agrupación folclórica Meskajoú. Esti certame va tener presencia asturiana gracies a la participación del Grupu Señaldá.
 
Asina, esti coleutivu conformáu pol Grupu Folclóricu L’Esperteyu (Samartín del Rei Aurelio), la Banda Gaites Esbardu (Avilés), el Grupu de Baille San Félix (Candás) y el Grupu Folclóricu El Cabazo (A Caridá) va presentar un espectáculu de dances asturianes col que’l públicu bretón va conocer les singularidaes de los bailles esistente per tola xeografía del país. Señaldá tien previsto actuar el sábadu en solitariu, a les 17.15 hores, y xunto con otres formaciones a les 18.15 hores, mentes que’l domingu va participar, a partir de les 15 hores, na muestra principal del festival xunto coles otres formaciones convidaes pola organización.
 
Xunto a la formación asturiana y Meskajoú, tamién participen nel Tro An Dans el grupu francés La Picouline (Villard-de-lans) y el galés Cwmni Dawns Werin Caerdidd (Cardiff). Gema Suárez, conceyala de Cultura de Samartín del Rei Aurelio, que va tar presente nel festival acompañando a L’Esperteyu, destacó la importancia d’esti tipu d’eventos que “contribúin a la conservación de la identidá de los pueblos y favorez la difusión de les nueses tradiciones más allá de les llendes del territoriu, estrechando llazos culturales y algamando un arriquecimientu mutuu”.
 
Na semeya, una actuación del Grupu de Baille San Félix de Candás.