El Grupu Epona festexa esti sábadu la Selmana de les Lletres con un cuentacuentos en Xixón

La Sala Espacio Líquido de Xixón acueye esti sábadu un cuentacuentos a cargu del Grupu Epona al que tán convidaos tolos neños y neñes. Los presentes van disfrutar del cuentu participativu y educativu ‘Los gatinos ecoloxistes’.
 
D’esta forma, el Grupu Epona quier celebrar la Selmana de les Lletres y la Selmana de Llibru xunto col públicu col que trabayen: los neños y neñes. El cuentacuentos va ser una bona oportunidá pa que los críos disfruten d’una tarde mui prestosa col cuentu ‘Los gatinos ecoloxistes’, un relatu que va dir acompañáu de delles ilustraciones que van surdiendo según avance la historia.
 
L’actividá ta prevista pa les 18 hores nel recintu asitiáu na cai Xovellanos númberu 3 de Xixón. Tres el cuentu, los neños y neñes asistentes van poder participar nun taller de dibuxu sobre la historia de ‘Los gatinos ecoloxistes’ y van recibir un regalín.