El Grupu de Baille Tradicional San Félix de Candás estrena 'Alluende'

El Grupu de Baille Tradicional San Félix de Candás ta acabante d’estrenar l’espectáculu 'Alluende' nel Espace Marine dientro de les actividaes del Festival Intercélticu d’An Oriant que se celebra na villa francesa dende’l 3 al 13 d’agostu.

“La mar aveza averar tierres que creemos lloñe. Si miramos la mar dende Candás sabemos que, anque nun la veamos, hai tierra al otru llau. Los marineros sí saben, dende cuantayá, que comparten una mesma mar. Poro, el Grupu de Baille Tradicional San Félix lleva consigo la mar, una mar que bailla, que güel, que suena como la de tantos otros llugares”. Éstes son les pallabres coles que’l grupu candasín fala de la so creación.

Énte más de 200 persones el grupu presentó un garrapiellu de bailles tradicionales faciendo un percorríu dende la fastera oriental hasta la occidental ensin escaecer los bailles de la costa asturiana. Tamién hubo tiempu pa que los candasinos ficieren una amuesa de traxes marineros a tolos presentes cola fin de que conocieren la forma de vistir de los marineros de la costa candasina a finales del sieglu XIX.

Un bon espectáculu qu’esperamos que’l Grupu de Baille San Félix de Candás represente peles tierres asturianes pa poder esfrutar d’esti percorríu ensin que seya 'Alluende'.