El Grupu de Baille ‘San Félix’ estrena ‘Palabres’ nel Teatru Prendes de Candás

'Palabres' ye un espectáculu multidisciplinar nel que la música entemécese cola llingua asturiana, la danza tradicional y l'arte audiovisual. Les primeres funciones van tener llugar los díes 8 y 9 de payares a les 20 hores, nel Teatru Prendes de Candás.

Músicos y escritores en llingua asturiana y gallego-asturianu van compartir escenariu nesti ambiciosu proyeutu del Grupu de Baille ‘San Félix’, que se presenta como “una propuesta artística multidisciplinar que, sofitada na ellaboración d’un análisis críticu de la situación actual de la llingua asturiana -en toles sos variantes- desendolca una obra onde lliteratura, artes escéniques, arte audiovisual, música y baille tradicional interactúen de manera simultánea nun mesmu espaciu escénicu.” La obra trátase d'una idea orixinal del escritor Xurde Fernández, cola que quier contribuir a la difusión y protección de les realidaes llingüstiques qu’existen n’Asturies. Un oxetivu, el de caltener la cultura y la tradición del país, que tuvo siempre presente nel colectivu a lo llargo de los sos 30 años d'hestoria.

‘Palabres’ va cuntar con música orixinal compuesta pola cantante y contrabaxista Mapi Quintana y l'acordionista Marcos García, que van actuar en directu xuntu a la guitarra de Rubén Bada, Fernando Arias na batería y el trompetista holandés Thomas Welvaadt. Van compartir protagonismu nel escenariu con dalgunos de los principales nomes de la lliteratura asturiana; Aurelio González Ovies, Xandru Fernández, Pablo Texón, Concha Quintana, Elías Veiga y Xosé Miguel Suárez, que van lleer fragmentos de la so obra. Tou ello va tar envolubráu nuna complexa puesta n'escena producida por Proima-Zebrastur y Sr. Paragües, cola collaboración y coordinación de Magar Cultura y el sofitu del Conceyu de Carreño.

Les entraes yá s'atopen a la vienta nel Teatru Prendes pa les primeres funciones, los díes 8 y 9 de payares a les 20 hores. L'espectáculu va entamar una xira por otros puntos de Asturies a lo llargo de 2013 y 2014. Una oportunidá pa presenciar “un nuevu discursu artísticu que s’articula alredor de dos puntos: el respetu a la tradición propia; y l’anovación y creación de víes d’accesu afayadices p’atraer a nuevos públicos, interesaos en reflexonar sobre’l propiu conceutu “tradición”. Too ello con un denominador común y central: el poder de la palabra.”