El grupu blimeín de teatru Refaxu fai un repás a la so trayeutoria nuna revista conmemorativa

‘Refaxu 1995-2011’ye’l títulu de la revista conmemorativa que fai un repás a los 16 años de vida d’esti grupu de teatru blimeín. Esta espublización va presentase esti xueves na Casona de Bravial, en Blimea.
 
Esta formación de teatru costumista debutó sobre les tables el 21 d’abril de 1995, baxo’l nome de Grupu de Teatru d’Ames de Casa de Blimea, cola representación de ‘El gallu la quintana’, que tuvo muncho ésitu en tol país. Tres ella, llegaríen más d’una ventena d’obres de teatru, non sólo de temática costumista, sinón tamién medieval col oxetu de representales nel Alcuentru Medieval de L’Entregu. Yá nel añu 2000, col grupu consolidáu na escena asturiana, decidióse dar un pasu más y tomar rumbu propiu, deslligándose de l’Asociación d’Ames de Casa de Blimea y pasándose a llamar Refaxu.
 
Baxo esta denominación llegaron los grandes ésitos de la formación, como’l premiu a la meyor actriz a Pili Barreñada nel Salón del Teatru Costumista de Candás del 2006 o’l de meyor direición a Aurora Suárez Carrio nesa mesma edición. Esti fechu, asina como otros munchos asocedíos nestos 16 años, se repasen nesta revista conmemorativa xunto con información detallada sobre toles obres representaes nesti tiempu y les actrices del grupu, asina como delles collaboraciones de persones qu’escribieron pa Refaxu.
 
La presentación de ‘Refaxu 1995-2011’, revista fecha en collaboración cola Oficina de Normalización Llingüística de Samartín del Rei Aurelio y la Conseyería de Cultura y Deporte, va tener llugar mañana a les 19 hores y nella van participar la direutora del grupu de teatru, Suárez Carrio; la conceyala de Cultura, Gema Suárez Torre; l’escritor  Xosé Ramón Martín Ardines; y Hugo Cortina Fanjul, responsable del serviciu de normalización del conceyu.