El gochu asturcelta podría dexar de tar n’estinción nuna década

|

El criador Paco Guerra considera que’l gochu asturcelta podría dexar de tar n’estinción en diez años “de siguir na progresión actual”. La recuperación d’esti animal entamó nel 2002, cuando quedaben mui pocos exemplares.
 
N’actualidá, la producción d’esti gochu autóctonu ye de 2.500 exemplares añales, con una población de 1.500, según datos de Guerra, miembro de l’Asociación de Criadores del Gochu Asturcelta que participó na presentación de les sétimes Xornaes Gastronómiques ‘Samartín del Gochu Asturcelta’ qu’entama Tierra Astur. N’opinión d’esti coleutivu, Asturies podría producir en carne de gochu asturcelta'l doble de la materia porcino qu'importa con sólo'l destín del 10 por cientu de la so superficie de monte susceptible d'aprovechamientu animal –castañu, carbayu, faya, ente otres–, lo que llevaría a contar con 900.000 exemplares d’esti animal. Nestos momentos, impórtense algo más de 400.000 gochos “d'una calidá mui inferior”.
 
D’esta forma “tendríamos autosuficiencia porcina”, recalcó Guerra, que quinxo destacar les cualidaes de la carne de gochu astucelta, “pura, d'alta calidá y con grasa oleica”. “La que ye mala ye la del gochu que s'importa, criao en granxes y alimentao con piensos compuestos tranxénicos”, añadió.
 
Les sétimes Xornaes Gastronómiques ‘Samartín del Gochu Asturcelta’ allargaránse hasta’l 27 de febreru nes tres sidreríes de Tierra Astur. Los clientes d’estos establecimientos van poder disfrutar d’un menú degustación de productos fechos con esti animal autóctonu por 22 euros. Tamién va poder adquirise nesti tiempu carne de gochu asturcelta na carnicería de Crivencar na uviedina cai de Santa Susana.

Contador Estadistiques