El Gobiernu va siguir flexibilizando midíes "nos díes próximos"

|
Melania Álvarez García

Les previsiones son eliminar aforos y abrir los centros sociales pa mayores. Esti xueves rexistráronse 16 casos nuevos de COVID-19.

"Son cuestiones concretes que van dir perfilándose nos díes próximos teniendo en cuenta esi contestu nel que venimos trabayando habitualmente, que ye'l marcu del Conseyu Interterritorial de Salú", esplicó Melania Álvarez García, vocera del Gobiernu. Midíes que van dir aplicándose "en función de la situación de la pandemia".

Ente les que citó la socialista ta la eliminación d'aforos. Tamién la recuperación de l'actividá de los centros sociales pa mayores, tanto en zones urbanes como rurales, depués de que los centros de día principiaren a abrir les sos puertes.

Segunda xornada ensin finaos

A falta de la espublización de los datos oficiales de la COVID-19, la Conseyería de Salú informó de la detección ayeri de 16 casos nuevos –l'actualización suma 1 más por un positivu non contabilizáu la xornada anterior–. Son 6 más que’l martes y el miércoles, cuando se comunicaron 10.

El Serviciu de Salú del Principáu d’Asturies (SESPA) fixo 1.618 pruebes de diagnósticu d'infeición activa, polo que la tasa de positividá s’asitió nel 1,29 por cientu. Esti porcentaxe a 7 díes yera enantes de l’actualización del 0,93 por cientu –ayeri baxó al 0,89 por cientu–.

Per segunda xornada nun hebo finaos cola enfermedá causada pol coronavirus SARS-CoV-2, polo que’l total de muertes nel andanciu caltiénse en 2.068. Siguen 11 persones ingresaes na UCI, mentes que la cantidá de pacientes en planta con confirmación o sospecha de COVID-19 baxa de 22 a 15.

 

Contador Estadistiques