El Gobiernu va reducir la velocidá máxima a 110 quilómetros per hora n'autopistes de manera temporal

A partir del 7 de marzu, la velocidá máxima n’autopista y autovía va ser de 110 quilómetros per hora. El Gobiernu toma esta midida de manera temporal p’aforrar en combustible, según comunicó esti vienres Alfredo Pérez Rubalcaba.
 
El vicepresidente primeru del Gobiernu dio esta anuncia esta mañana depués del Conseyu de Ministros. Según afirmó, la escalada del preciu del petroleu polos incidentes que ta viviendo Libia lleva al Executivu a tomar esta decisión que va conllevar la modificación de la señalización de toles autopistes y autovíes. Al mesmu tiempu, Rubalcaba anunció un descensu del preciu de los billetes de Renfe –de media distancia y cercaníes– del 5 por cientu pa fomentar el tresporte públicu.
 
Les asociaciones d’automovilistes mostráronse contraries a esta midida que yá tien un precedente, nel añu 1976, cuando se baxó la velocidá máxima de 130 quilómetros per hora a 100 pola crisis del petroleu. Según recuerden estos coleutivos, el númberu d’accidentes aumentó tres la reducción.